Координаталық жазықтық

Бүгін не үйренеміз?

Сен жазықтықтағы нүктенің орнын екі санмен беруді және абсцисса мен ординатаны ажыратуды үйренесің.

Түсіндірме

• Координаталық түзуде нүктенің орны бір санмен беріледі. Жазықтықта нүктенің орнын екі сан анықтайды.
• Санақ басы О нүктесінде қиылысатын, өзара перпендикуляр екі координаталық түзу тік бұрышты координаталар жүйесін құрайды. Бірлік кесінділері бірдей болады.
• Бұл жүйе орналасқан жазықтық координаталық жазықтық деп аталады, белгіленуі — Оху.
• Нүктенің бірінші саны — абсциссасы (x), екінші саны — ординатасы (y). Екеуі бірге нүктенің координаталары деп аталады.

Мысалдар

1. D(2; 5) жазуында абсцисса 2, ордината 5.
2. Сыныпта парта орны «3-қатар, 2-парта» деп екі санмен беріледі. (3; 2) және (2; 3) — әртүрлі орындар.
3. Астананың Жер бетіндегі орны да екі санмен — ендік және бойлықпен беріледі.

Есте сақта!

• Жазықтықтағы нүктені екі сан анықтайды.
• Координаталар жақшаның ішінде жазылады: алдымен абсцисса, содан кейін ордината.

Өзіңді тексер

1. D(2; 5) нүктесінің ординатасы нешеге тең?
2. Нүктенің координаталарын жазғанда қай сан бірінші тұрады?